स्वातंत्र्यसंग्रामातील दुर्मिळ छायाचित्रांच्या कवठेमहांकाळ, सांगली येथील मल्टिमीडिया प्रदर्शनाचे उद्घाटन 

सांगली :-

स्वातंत्र्याच्या अमृत महोत्सवाचा सांगता कार्यक्रम, ‘मेरी माटी मेरा देश’  आणि फाळणी वेदना स्मृती दिवसानिमित माहिती आणि प्रसारण मंत्रालयाच्या केंद्रीय संचार ब्यूरो, कोल्हापूर आणि कवठेमहांकाळ तहसीलदार कार्यालय तसेच पंचायत समिती कार्यालय यांच्या वतीने आयोजित तीन दिवसीय डिजिटल मल्टीमीडिया प्रदर्शनाचे उद्घाटन  कवठेमहांकाळ तहसीलदार कार्यालयाच्या प्रांगणात संपन्न झाले. या  प्रदर्शनाचे उद्घाटन स्वातंत्र्यसैनिक निवृत्ती तात्या पाटील यांच्या पत्नी  सावित्री पाटील ह्यांच्या हस्ते झाले. यावेळी परीविक्षाधीन पोलीस उपअधीक्षक संदेश नाईक, कवठेमहांकाळचे गटविकास अधिकारी उदयकुमार कुसुरकर आणि इतर मान्यवर उपस्थित होते.

स्वातंत्र्यसंग्रामातील महत्वपूर्ण घटना आणि भारत-पाकिस्तान फाळणीच्या वेळी घडलेल्या घडामोडी यासंदर्भात हे प्रदर्शन आहे. सदर प्रदर्शनामध्ये 1857 ते 1947 पर्यतच्या स्वातंत्र्यसंग्रामाची माहिती, भारत-पाकिस्तान फाळणीच्या वेळी घडलेल्या घडामोडी आणि घटनांविषयीची दुर्मिळ छायाचित्रे आणि माहिती प्रदर्शित केली जात आहे. व्ही आर  गॉगल्स सारख्या डिजिटल  माध्यमातून स्वातंत्र्यसैनिकांची कार्याची माहिती देणारी  छायाचित्रे, ऐतिहासिक स्थळे आणि दुर्मिळ दृश्ये या प्रदर्शनात दाखवली जात असून त्याला आबालवृद्धांचा भरघोस प्रतिसाद मिळत आहे.

दिनांक 14 ते 16 ऑगस्ट 2023 या कालावधीमध्ये कवठेमहांकाळ तहसीलदार कार्यालयाच्या प्रांगणात हे प्रदर्शन पाहता येईल.

भारतीय स्वातंत्र्यालढ्याबद्दल सामान्य नागरिकांना माहिती मिळावी  या उद्देशाने हा उपक्रम राबविण्यात येत आहे.जास्तीत जास्त नागरिक, इतिहास अभ्यासक, संशोधक्, स्पर्धा परीक्षांचे विद्यार्थी आणि  विद्यार्थ्यांनी छायाचित्र प्रदर्शनाचा लाभ घ्यावा, असे आवाहन आयोजकांनी केले आहे.

त्याचबरोबर आज ‘’मेरी माटी मेरा देश’’  अभियानांतर्गत सांगली जिल्ह्यातील कवठेमहांकाळ तालुक्यामध्ये रांजणी  गावामध्ये विविध कार्यक्रमांचे आयोजन करण्यात आले होते.  यामध्ये शिलाफलकाचे अनावरण , वृक्षारोपण,  झेंडावंदन तसेज माती हातात घेऊन सेल्फी काढण्याचे कार्यक्रम अंतर्भूत होते.  यावेळी केंद्रीय संचार ब्युरोतर्फे स्वातंत्र्यदिनावर आधारित विविध स्पर्धांचे आयोजन करण्यात आले.