पालकमंत्री चंद्रकांत पाटील यांच्या हस्ते जतमध्ये वन विभागाच्या दोन इमारतींचे लोकार्पण  

    दर्पण न्यूज   सांगली – सांगली वन विभागाच्या अंतर्गत जत येथील वनपरिक्षेत्र अधिकारी कार्यालय व वनपाल निवासस्थानाच्या नव्या इमारतींचे उद्घाटन व लोकार्पण राज्याचे उच्च व तंत्रशिक्षण, संसदीय कार्य मंत्री तथा सांगली जिल्ह्याचे पालकमंत्री चंद्रकांत पाटील यांच्याहस्ते करण्यात आले.

        या कार्यक्रमास आमदार सदाभाऊ खोत, आमदार गोपीचंद पडळकर, उपवनसंरक्षक सागर गवते, सहायक वनसंरक्षक नवनाथ कांबळे, सामाजिक वनीकरण विभागाचे विभागीय वन अधिकारी प्रशांत वरुडे, जतचे वनपरिक्षेत्र अधिकारी निखिल पाटील उपस्थित होते.

        यावेळी पालकमंत्री चंद्रकांत पाटील म्हणाले, आमदार गोपीचंद पडळकर यांनी केलेल्या सूचनेप्रमाणे जत शहराच्या मध्यभागी असलेल्या वन विभागाच्या जागेवर काही नाविन्यपूर्ण उपक्रमांसाठी शासनस्तरावर पाठपुरावा करण्यात येईल. जतच्या पर्यटनाच्या अनुषंगाने चांगले पर्याय सुचवावेत. त्यासाठी जिल्हा नियोजन समितीमधून निधी उपलब्ध करून देऊ, असे त्यांनी सांगितले.

        आमदार गोपीचंद पडळकर यांनी जत शहराच्या मध्यवर्ती ठिकाणी असलेल्या वन विभागाच्या जागेवर बगीचा व वॉटर पार्क उभारण्यासाठी मागणी केली.

प्रास्ताविक सागर गवते यांनी केले. यावेळी तसेच विविध मान्यवर, लोकप्रतिनिधी, वनविभागाचे अधिकारी, कर्मचाऱ्यांसह अनेक मान्यवर उपस्थित होते.

        वन विभागाच्या दोन्ही इमारती राज्य योजना अंतर्गत बांधण्यात आल्या असून, वनपरिक्षेत्र कार्यालयाच्या इमारतीसाठी जवळपास २६ लाख, ५८ हजार रुपये इतका खर्च झाला आहे. वनपाल निवासस्थानासाठी जवळपास २३ लाख, ३३ हजार इतका निधी खर्च करण्यात आला आहे. नवीन इमारतीमुळे वनविभागाचे प्रशासन अधिक सक्षम व गतिमान होण्यास मदत होणार आहे.