सांगली; बांधकाम कामगारांना गृहपयोगी वस्तू संचाचे मोफत वितरण: सहाय्यक कामगार आयुक्त मु. अ. मुजावर
सांगली : महाराष्ट्र इमारत व इतर बांधकाम कामगार कल्याणकारी मंडळ, मुंबई अंतर्गत बांधकाम कामगारांना गृहपयोगी वस्तू संच वितरण योजना सुरु करण्यात आली आहे. ही योजना निशुल्क स्वरुपात असून जिवीत नोंदणीकृत बांधकाम कामगारांना याचा लाभ वितरीत करण्यात येतो, असे सहाय्यक कामगार आयुक्त मु. अ. मुजावर यांनी प्रसिध्दीपत्रकाव्दारे कळविले आहे.
सांगली जिल्ह्यातील पात्र बांधकाम कामगारांना मंडळाच्या वतीने गृहपयोगी वस्तू संच मोफत/ निःशुल्क वितरीत करण्यात येतो. बांधकाम कामगारांनी कोणत्याही एजंट / दलाल व इतर कोणत्याही मध्यस्थी व्यक्तिंच्या प्रलोभनाला बळी न पडता सर्व अनुषंगिक कामकाजासाठी कोणत्याही व्यक्तिसोबत आर्थिक व्यवहार करु नये, व्यवहारासंबंधी कामगारांची फसवणूक व दिशाभूल झाल्यास त्याबाबत सहाय्यक कामगार आयुक्त कार्यालय जबाबदार राहणार नाही. याबाबत पोलिस विभागाकडे रितसर तक्रार करावी. सांगली जिल्ह्यातील सर्व बांधकाम कामगारांनी याची नोंद घ्यावी, असे आवाहन श्री. मुजावर यांनी केले आहे.
