गोंय/पणजी अभिजीत रांजणे :-
48 वरां भितर फिल्म एक्झिक्यूशन, सिनेमाटोग्राफी आनी हेर तंत्रीक गजाली पुराय करताना, निर्मिती पंगडान दाखयल्ली संघटनात्मक भावना आनी बांधीलकी असामान्य आसा, अशें ‘ओड’ फिल्माचे दिग्दर्शक अखिल लोटलीकार हांणी सांगलें. गोंयच्या उणी जावपी दर्यादेगेवेचेर भाष्य करपी, विचार करपासारको लघुपट ‘ओड’ ह्या सिनेमाक, काल गोंयांत सुरू आशिल्ल्या 54व्या भारतीय आंतरराष्ट्रीय चित्रपट महोत्सवांतल्या ‘75 क्रिएटिव्ह माइंड्स ऑफ टुमॉरो’ (सीएमओटी) हातूंत उत्कृश्ट चित्रपट पुरस्कार फावो जालो.
ही माची उपलब्ध करून दिल्ले खातीर म्हायती आनी वितरावणी मंत्रालय आनी एनएफडीसीचे उपकार मानतना, अखिल लोटलीकार हांणी सांगलें, की ही सर्त तरणाट्या सृजनशील मनांक आंतरराष्ट्रीय माचयेर फिल्म निर्मितीं आनी कथा सांगपाच्या कुशळटायेत, नवी वाट उक्ती करता.
फिल्म तयार करतना फूडो करचे पडिल्ल्या आव्हानांचेर भर दितना तांणी सांगलें की, भायर खर सुर्याच्या उजवाडा खाला शूटिंग करतना उजवाडाचेर नियंत्रण दवरप कठीण थारलें.
दर्यादेगेक वाचोवपाच्या सोबीत सादरीकरणांत ‘ओड’ हें फिल्म आमकां दर्यादेगांचेर सुवात उरना, म्हणून बोट उबी करपाक अडचणी भोगपी नुस्तेकार मार्सेलीनाच्या प्रवासांत आनी संघर्शांत व्हरता. ताचे बदला तो आपली बोट शाराच्या मदीं व्हरता, आनी दर्यादेगेर बोट दवरपाक सुवात ना, अशी कागाळ करता.
जूरी वांगडी आनी शॉर्ट्स टीव्हीचे सीईओ कार्टर पिल्चर हांणी सांगलें की, तरणाट्या सृजनशील मनांक तांची प्रतिभा दाखोवपा खातीर सीएमओटी सारको प्लॅटफॉर्म दिवपाची संकल्पना अदभूत आसा.
जूरी वांगड्यांतलो दिग्दर्शक शूजीत सरकार हांणी सांगलें, की सगळे चित्रपट खऱ्यांनीच प्रासंगीक आनी विचार करपा सारके आसात आनी पर्यावरणाची राखण आनी सांबाळ करपाच्या खूब म्हत्वाच्या विशयाचेर आदारीत आसात. ताणें मुखार म्हणलें, की “तुमी सगळे विजेते आसात’’.
फिल्म चॅलेंजाचो एक भाग म्हूण, 75 सीएमओटी भाग घेवप्यांक पांच पंगडांनी विभागून ‘मिशन लायफ’ ह्या विशयाचेर 48 वरां भितर लघुपट तयार करपाक सांगिल्ले. दरेका पंगडान पंदरा वांगड्यांनी, पर्यावरण सांबाळ आनी राखण ह्या विशयाचेर वट्ट पांच चित्रपट तेजस्वी कथानक, संपादन, छायाचित्रण, पोस्ट प्रोडक्शनान लघुपट तयार केले.
एनएफडीसीन शॉर्ट्स इंटरनॅशनल कंपनीच्या भागीदारींत ही सर्त आयोजित केल्या. तशेंच 19 राज्यांतले सीएमओटीत वाटो घेवप्यांनी, संवसारीक सिनेमाच्या मास्टरांनी क्युरेट केल्ल्या कार्यशाळा आनी मास्टरक्लास सत्रांक हाजेरी लायली.
केंद्रीय म्हायती आनी वितरावणी मंत्री, श्री अनुराग सिंग ठाकुर हांच्या विचारांतल्यान तयार जाल्ल्या ह्या उपक्रमांत, चित्रपट निर्मितीच्या वेगवेगळ्या वेवसायांतल्या तरणाट्या सृजनशील प्रतिभेक प्रोत्साहन दिवपाचो हेत आसा. ‘आजादी का अमृत महोत्सव’ उत्सवाचो एक भाग म्हूण भारताच्या स्वातंत्र्याचें 75वें वर्स मनोवपा खातीर 2021 वर्सा सुरू केल्लो हो उपक्रम सध्या तिसऱ्या वर्सा आयोजित केला.
