दर्पण न्यूज सांगली : महाराष्ट्र शासनाच्या सांस्कृतिक कार्य विभाग आणि सांस्कृतिक कार्य संचालनालय यांच्या वतीने सुप्रसिद्ध ग्रामीण कथाकार शंकर पाटील यांच्या साहित्यावर आधारित ‘आभाळाचे रंग’ या विशेष कार्यक्रमाचे आयोजन करण्यात आले आहे. हा कार्यक्रम रविवार, दिनांक २२ फेब्रुवारी, २०२६ रोजी सायंकाळी ६:०० वाजता मिरज येथील बालगंधर्व नाट्यमंदिर येथे संपन्न होणार आहे. मिरज व परिसरातील साहित्य आणि कलाप्रेमींनी या सांस्कृतिक मेजवानीचा लाभ घ्यावा, असे आवाहन सांस्कृतिक कार्य संचालनालयाचे संचालक श्रीराम पांडे यांनी केले आहे.
सांस्कृतिक कार्य मंत्री ॲड. आशिष शेलार व सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली हा सांस्कृतिक कार्यक्रम पार पडणार आहे. या कार्यक्रमात शंकर पाटील यांच्या खास विनोदी शैलीतील नाट्य प्रहसन, कथा अभिवाचन आणि त्यांनी लिहिलेल्या अजरामर चित्रपटांतील नृत्यांचे सादरीकरण केले जाणार आहे. कार्यक्रमाचे वैशिष्ट्य – लेखन: योगेश मार्कंडे दिग्दर्शन: मिलिंद खानविलकर, प्रमुख कलाकार: वर्षा दांदळे, माधवी जुवेकर, गणेश रेवडेकर, अभिजीत झुंजारराव, चैतन्य सरदेशपांडे, नंदकुमार गोरुले, सचिन वळंजू, दिलीप कराड आणि मिरजमधील स्थानिक नृत्य कलाकार. या कार्यक्रमाचे निवेदन जेष्ठ नाट्य कलाकार संजय मोने करीत आहेत. हा कार्यक्रम रसिकांसाठी पूर्णपणे विनामूल्य असून, प्रवेशिका नाट्यगृहावर उपलब्ध आहेत. ‘प्रथम येणाऱ्यास प्राधान्य’ या तत्त्वावर प्रवेश दिला जाणार आहे.
