सांगली फळ महोत्सवात नऊ लाखांची उलाढाल  ; पणन अधिकारी ओंकार माने

    दर्पण न्यूज  मिरज / सांगली :- महाराष्ट्र राज्य कृषि पणन मंडळ, कोल्हापूर व कृषि उत्पन्न बाजार समिती सांगली यांच्या संयुक्त विद्यमाने आयोजित तीन दिवसीय फळ महोत्सवात 9 लाख 12 हजार रूपयांची उलाढाल झाली असल्याची माहिती पणन अधिकारी ओंकार माने यांनी दिली

              सांगली जिल्ह्यातील फळ उत्पादक शेतकरी यांना बाजारपेठ उपलब्ध करून देणे व मॅग्नेट प्रकल्पाअंतर्गत फळांवर प्रक्रिया करून त्याची उत्पादने तयार करण्याकरिता शेतकऱ्यांना पणन मंडळामार्फत यापुढेही सहकार्य केले जाईल, असे कृषी पणन मंडळाचे उप सरव्यवस्थापक डॅा. सुभाष घुले यांनी सांगितले. यावेळी कृषी पणन मंडळाचे पणन अधिकारी ओंकार माने, प्रतीक गेनुगडे, अनिल जाधव, सुयोग टकले, संदेश पिसे, सुशांत खाडे उपस्थित होते.

            सांगली फळ महोत्सव 2025 मध्ये सांगली जिल्ह्यातील जत व कवठेमहांकाळ तालुक्यातील पिवळे/गुलाबी ड्रॅगनफ्रुट, विटा व वाळवा तालुक्यातील पेरू, चिकू, केळी तसेच आटपाडीचे अंजीर, डाळींब, सीताफळ व विविध फळांची विक्री शेतकऱ्यांमार्फत करण्यात आली. या महोत्सवात एकूण 22 फळ उत्पादक शेतकरी यांनी सहभाग घेतला होता. महोत्सवामध्ये विविध फळांचा देखावा लोकांचे आकर्षण ठरला. जत तालुक्यातील ड्रॅगन उत्पादक शेतकऱ्याने तयार केलेले ड्रॅगनफ्रुटचे आईस्क्रीम पहिल्यांदाच सांगली शहरवासीयांना चाखायला मिळाली. तसेच मॅग्नेट प्रकल्पाअंतर्गत व्यंकटेश ॲग्रो यांनी तयार केलेली जांभूळ, लिंबू, पपई व स्ट्रॉबेरी पासूनची  उत्पादने महोत्सवात विक्रीसाठी उपलब्ध होती.

      पणन मंडळाकडून आयोजित केलेल्या या महोत्सवात सहभागी झालेल्या संभाजी कोडग, विजय मोरे, प्रविण कुंभार इत्यादी शेतकऱ्यांनी पणन विभागाचे आणि जिल्हाधिकारी अशोक काकडे यांचे आभार मानले व पुढेही असेच महोत्सव आयोजित करण्याबाबत विनंती केली.