दर्पण न्यूज सांगली : भारताचा 80 वा स्वातंत्र्य दिन समारंभ शनिवार, दिनांक 15 ऑगस्ट 2026 रोजी सकाळी 9.05 वाजता साजरा करण्यात येणार आहे. या दिवशी राज्याचे उच्च व तंत्र शिक्षण, संसदीय कार्य मंत्री तथा सांगली जिल्ह्याचे पालकमंत्री चंद्रकांत पाटील यांच्याहस्ते जिल्हाधिकारी कार्यालय, सांगली येथे मुख्य शासकीय ध्वजारोहण होणार आहे.
दिनांक 15 ऑगस्ट 2026 रोजी सकाळी 8.35 ते 9.35 या वेळेत इतर कोणताही शासकीय किंवा निमशासकीय समारंभ आयोजित करण्यात येऊ नये. जर एखाद्या कार्यालयास अथवा संस्थेला आपला स्वत:चा ध्वजारोहण समारंभ आयोजित करावयाचा असल्यास त्यांनी तो समारंभ सकाळी 8.35 च्या पूर्वी किंवा 9.35 वाजल्यानंतर आयोजित करावा, असे आवाहन जिल्हा प्रशासनातर्फे करण्यात आले आहे.
जिल्हाधिकारी कार्यालय सांगली येथे होणाऱ्या ध्वजारोहणाच्या मुख्य शासकीय समारंभास स्थानिक लोकप्रतिनिधी, जिल्हा परिषद /पंचायत समिती सदस्य, नगरसेवक, स्वातंत्र्य सैनिक, शहीद जवानांच्या पत्नी व आईवडील, शौर्य पुरस्कार विजेते, स्थानिक राजकीय पक्षाचे प्रमुख, डॉ. बाबासाहेब आंबेडकर समाजभूषण पुरस्कार प्राप्त व्यक्ती, स्थानिक शासकीय अधिकारी व मान्यवर नागरिकांनी उपस्थित रहावे, अधिकाधिक नागरिकांना हा सोहळा घरबसल्या पाहता यावा, यासाठी नागरिकांनी बेवसाईटव्दारे होणारे थेट प्रक्षेपण पहावे,असे आवाहन जिल्हा प्रशासनाच्या वतीने करण्यात आले आहे.
About the Author
