भिलवडी :- पलूस तालुक्यातील खंडोबाचीवाडी येथे भिलवडी स्टेशन ते खंडोबाचीवाडी येथे रविवार दि.२६ मार्च २०२३ रोजी दुपारी एकच्या सुमारास नायरा पेट्रोल पंपाजवळ भीषण अपघात झाला., या अपघातामध्ये एक अकरा वर्षीय बालक जागीच ठार झाला. घटनेनंतर चालक फरार झाला मात्र पोलिसांनी शिताफीने अटक केले.
भिलवडी पोलीस ठाणेकडून मिळालेली माहिती अशी की,भिलवडी तासगाव रोडवर भिलवडी कडून तासगावकडे भरधाव वेगाने जाणारी एम एच १० सी एक्स ४०८१ मारुती सुझुकी सियाज हि चार चाकी गाडी पेट्रोल पंपाच्या समोर, रस्त्याकडेला असणाऱ्या रसवंती गृहामध्ये भरधाव वेगाने येऊन शिरली.यावेळी संतोष गोपाळ शिंदे, जयश्री संतोष शिंदे व त्यांचा मुलगा समर्थ हे या रसवंतीगृहामध्ये होते.गाडीचा वेग इतका होता की,गाडी रसवंतीगृहाच्या पत्र्याच्या शेडला धडकताच शेड उखडले गेले.या धडकेमध्ये रसवंती चालक संतोष गोपाळ शिंदे राहणार खंडोबाचीवाडी यांचा मुलगा समर्थ संतोष शिंदे वय वर्षे ११ रा. खंडोबाचीवाडी (ता.पलूस) याच्या अंगावरून गाडी गेल्याने त्याचा जागीच मृत्यू झाला.तर त्याची आई जयश्री शिंदे या जखमी झाल्या आहेत.गाडी इतक्या भरधाव वेगात शिरली की, रसवंतीगृहाचे शेड उचकटून शेतामध्ये फरपटत गेले. त्याचबरोबर समर्थ यासही गाडीने फरफटत ऊसाच्या शेतामध्ये नेले.
घटनेची माहिती मिळताच भिलवडी पोलिसांनी तात्काळ घटनास्थळी धाव घेऊन, परिस्थितीची पाहणी करून, पंचनामा करण्याचे काम सुरू केले. सदर घटना नायरा पेट्रोल पंपाच्या सीसीटीव्ही कॅमेऱ्यात कैद झाली आहे.
अपघाताची माहिती मिळताच नागरिकांनी घटनास्थळी धाव घेत, मोठी गर्दी केली होती.सदर घटनेची फिर्याद सुरज अधिकराव शिंदे वय वर्षे ३० रा.शिंदे मळा खंडोबाचीवाडी यांनी भिलवडी पोलीस ठाण्यात दिली आहे.यामध्ये त्यांनी वरील माहितीसह कार चालकाचे नाव अनिकेत जगन्नाथ चव्हाण रा.सिद्धेवाडी ता.तासगांव,जि.सांगली असे असल्याचे समजते. तसेच सदरचा अपघात हा त्याच्या चुकीमुळे झाला असल्याचे फिर्यादीमध्ये नमूद केले आहे.दरम्यान संबंधित गाडी चालकास भिलवडी पोलिसांनी ताब्यात घेतले आहे.अधिक तपास भिलवडी पोलीस करीत आहेत.
