सांगली जिल्ह्यातील विविध कृषि पुरस्कारासाठी प्रस्ताव सादर करा : जिल्हा अधीक्षक कृषि अधिकारी विवेक कुंभार
सांगली : महाराष्ट्र शासन कृषि विभागामार्फत सन 2024 या वर्षामध्ये कृषि आणि संलग्न क्षेत्रामध्ये उल्लेखनीय कार्य करणाऱ्या व्यक्ती, गट, संस्था यांच्याकडून विविध कृषि पुरस्कारासाठी प्रस्ताव मागविण्यात आले आहेत. जास्तीत जास्त शेतकरी, गट, संस्था, व्यक्ती यांनी विविध कृषि पुरस्कारासाठी प्रस्ताव नजीकच्या तालुका कृषि अधिकारी कार्यालयाकडे सादर करावेत, असे आवाहन जिल्हा अधिक्षक कृषि अधिकारी विवेक कुंभार यांनी प्रसिध्दीपत्रकाव्दारे केले आहे.
कृषि विभागामार्फत राज्यात कृषि आणि संलग्न क्षेत्र तसेच फलोत्पादन क्षेत्रामध्ये उल्लेखनिय कार्य करणाऱ्या, कृषि उत्पादन आणि उत्पन्न वाढीकरिता योगदान देणाऱ्या शेतकऱ्यांचा तसेच कृषि विस्तारामध्ये बहुमोल कामगिरी करणाऱ्या राज्यातील शेतकरी, महिला शेतकरी, कृषि पत्रकार, गट तसेच संस्था यांना डॉ. पंजाबराव देशमुख कृषिरत्न पुरस्कार, वसंतराव नाईक कृषिभूषण पुरस्कार, जिजामाता कृषिभूषण पुरस्कार, कृषिभूषण (सेंद्रीयशेती) पुरस्कार, उद्यानपंडीत पुरस्कार, वसंतराव नाईक शेतीमित्र पुरस्कार, वसंतराव नाईक शेतीनिष्ठ शेतकरी पुरस्कार, युवा शेतकरी पुरस्कार व कृषि विभागामध्ये उल्लेखनीय कार्य करणाऱ्या अधिकारी/ कर्मचारी यांना पद्मश्री डॉ. विठ्ठलराव विखे पाटील कृषि सेवा रत्न पुरस्कार प्रदान करून सन्मानित करण्यात येते. विविध कृषि पुरस्कार प्रस्ताव तयार करण्याकामी अधिक माहितीसाठी नजिकच्या तालुका कृषी अधिकारी कार्यालयाशी संपर्क साधावा, असे प्रसिध्दीपत्रकात म्हटले आहे.
________________________________
सन 2025 च्या स्थानिक सुट्ट्या जाहीर
सांगली : सांगली जिल्ह्यातील सर्व महाराष्ट्र शासनाच्या कार्यालयांसाठी तसेच सर्व निमशासकीय कार्यालयांसाठी जिल्हा प्रशासनाने सन 2025 मधील स्थानिक सुट्ट्या जाहीर केल्या आहेत.
जाहीर केलेल्या स्थानिक सुट्ट्या पुढीलप्रमाणे. मंगळवार दिनांक 14 जानेवारी 2025 (मकर संक्रांती), सोमवार दिनांक 22 सप्टेंबर 2025 (घटस्थापना) व सोमवार दिनांक 20 ऑक्टोबर 2025 (नरक चतुर्दशी).
