पुणे विभागीय महसूल क्रीडा व सांस्कृतिक स्पर्धेत सर्वसाधारण विजेतेपदात कोल्हापूर जिल्ह्याने पटकविला प्रथम क्रमांक
पुणे विभागीय महसूल क्रीडा व सांस्कृतिक स्पर्धा उत्साहात संपन्न
सांगली : नव कृष्णा व्हॅली स्कूल कुपवाड येथे 19 जानेवारी पासून आयोजित केलेल्या पुणे विभागीय महसूल क्रीडा स्पर्धा आज मोठ्या उत्साहात संपन्न झाल्या. सर्वसाधारण विजेतेपदामध्ये प्रथम क्रमांक कोल्हापूर जिल्ह्याने, व्दितीय सांगली तर तृतीय क्रमांक सोलापूर जिल्ह्याने पटकविला. विजेत्या संघाना जिल्हाधिकारी डॉ. राजा दयानिधी यांच्य हस्ते चषक प्रदान करण्यात आला. या स्पर्धेत प्रत्येक जिल्ह्याने चांगली कामगिरी केल्याबद्दल जिल्हाधिकारी डॉ. राजा दयानिधी यांनी सर्वांचे अभिनंदन करून खेळाडूंना शुभेच्छा दिल्या.
नव कृष्णा व्हॅली स्कूल कुपवाड येथे संपन्न झालेल्या बक्षीस वितरण व समारोप कार्यक्रम प्रसंगी पुणे विभागाच्या उपायुक्त (सर्वसाधारण) वर्षा उटवाल, अपर जिल्हाधिकारी डॉ. स्वाती देशमुख-पाटील, निवासी उपजिल्हाधिकारी ज्योती पाटील, उपजिलहाधिकारी विजया पांगारकर, उप जिल्हा निवडणूक अधिकारी निता सावंत-शिंदे, उपजिल्हाधिकारी (भूसंपादन) डॉ. विकास खरात, उपजिल्हाधिकारी (महसूल) राजीव शिंदे, उपविभागीय अधिकारी मिरज उत्तम दिघे, जिल्हा पुनर्वसन अधिकारी रघुनाथ पोटे, तहसिलदार अनंत गुरव यांच्यासह महसूल विभागाचे अधिकारी, कर्मचारी उपस्थित होते.
या स्पर्धा सुरळित पार पाडण्यासाठी पुणे विभागातील सर्व जिल्ह्यांनी चांगले सहकार्य केल्याबद्दल जिल्हाधिकारी डॉ. राजा दयानिधी यांनी त्यांचे आभार मानले. तसेच या स्पर्धेसाठी मदत केलेल्या सर्वांचे त्यांनी आभार मानले.
पुणे विभागाच्या उपायुक्त (सर्वसाधारण) वर्षा उटवाल लड्डा म्हणाल्या, पुणे विभागीय महसूल क्रीडा व सांस्कृतिक स्पर्धेचे सांगली जिल्ह्याने उत्कृष्ट आयोजन केले. अत्यंत कमी कालावधीत कामाच्या व्यापातही अत्यंत चांगल्या पध्दतीने नियोजन केल्याबद्दल कौतुक केले. हार जीत होत असते, पुढील वर्षाच्या स्पर्धेसाठी उत्साहाने प्रगती करावी असे सांगून आयोजकांचे व खेळाडूंचे अभिनंदन केले.
अपर जिल्हाधिकारी डॉ. स्वाती देशमुख म्हणाल्या, या स्पर्धा प्रत्येक वर्षी होत रहाव्यात. स्पर्धेमुळे मनोबल उंचावते असे सांगून खेळाडूंना त्यांनी शुभेच्छा दिल्या.
पुढील वर्षी पुणे विभागीय महसूल क्रीडा व सांस्कृतिक स्पर्धेसाठीचे यजमान पद सातारा जिल्ह्याकडे असल्याने जिल्हाधिकारी डॉ. राजा दयानिधी यांच्या हस्ते सातारा जिल्ह्याच्या उपजिल्हाधिकारी वैशाली राजमाने यांच्याकडे ध्वज सुपूर्द केला.
यावेळी स्पर्धेसाठी मदत केलेल्या चितळे उद्योग समूहाचे मकरंद चितळे, सिनर्जी हॉस्पीटलचे प्रसाद जगताप, नवकृष्णा व्हॅली क्लबचे विनायक जोशी, महानगरपालिकेचे उपायुक्त अनिल पाटील, विकास साबळे, पोलीस बँड पथक, आप्पासाहेब बीरनाळे शाळेचे सागर बीरनाळे, सांगलीचे वैशिष्ट असलेली हळद व बेदाणा खेळाडूपर्यंत पोहोचवल्याबद्दल विट्याचे जगन्नाथ पाटील व सांगलीचे प्रशांत दमामे यांच्या जिल्हाधिकारी डॉ. राजा दयानिधी यांच्या हस्ते सत्कार करण्यात आला. तसेच जिल्हाधिकारी डॉ. राजा दयानिधी व मान्यवरांच्या हस्ते विविध क्रीडा व सांस्कृतिक स्पर्धेतील विजेत्यांना पारितोषिक वितरण करण्यात आले.
प्रास्ताविक उपजिल्हाधिकारी विजया पांगारकर यांनी केले. आभार निवासी उपजिल्हाधिकारी ज्योती पाटील यांनी मानले. यावेळी पुणे, सातारा, कोल्हापूर, सांगली, सोलापूर जिल्ह्यातील महसूल विभागाचे अधिकारी, कर्मचारी खेळाडू उपस्थित होते.